ومضه

ماهــم بالبعـد بس شوفتك حلوا

موبيدي امن اودعك فرگتك بلوا

لاتهتـم حبيبي القسمه هچ اتريد

عيش ابراحتك هل دنيه ماتسوا

 

مهــــدي ابوحاجات الهليــــچي

هوسات غزل

ترید انکر هواک اشلون وانسه البینک او بینی

وانه ابکاس خمر اشفاک چنت امسکر اسنینی

عطرک بیه بعده ایفوح واصورک وسط عینی

         گوم ارجع طیفک بچانی

 

 

الشبّعو بطن المذلّه او نامو ابدار القهر

تبعوا اخطوط الرذاله انباگو ابظهر الحمر

مالهم ظله ابسلفنه او خل یغضّون النظر

         عن بیت المال او عن داره

 

تلاگيت اويا حلوة طول عدهه اعيون خمريه

تكتل وانه هم مگرود طبعاً صافي النيه

فرد لحظه او شفتهه اشلون من رفعت البوشيه

          يكتل برطمهه الحدراني

 

اعيونچ اكبر طائفيه او فتنه ما بين الشعوب

ابشوفتچ تفتي المراجع يالله حي اعلى الذنوب

ينتمي الگبتين جسمچ گلبي منهن كيف اتوب

            مشتوله ابشفتچ دگاته

 

         مهدي ابوحاجات الهليچي

قصیده راح انسحب

راح انسحب مو روحي ما مرتاحه

حيث الجهل طشر فنون الساحه

صار الشعر والفن لعب ما معقول

كلمن اجه او للفن يشيل اسلاحه

حوا اصبحت تحكم جميع الاطياف

و آدم رجع يبحث على التفاحه

سهران شعري اوماكو قافية النوم

گلب المشاعر گطّعوا سبّاحه

رد الجهل والجاهليه امن اجديد

بيت العلم ضاع اببحر مفتاحه

سر النجابه انباح يم الشمات

اوغيم الرذاله اتغث بلادي ارياحه

سدّوا حلگ كلمن يسولف بالشوگ

واسيوف سحبوا عالرگب ذبّاحه

حوّا اصبحت ﻵدم تذب ناعم حيث

يركض وراها او ناسي كل اجراحه

والشيله تبچي اعيونهه اتكت ادموم

كوخ المعزه اظلم صبح مصباحه

فن اوشعر والصيت ظل يلعب دور

واليحچي عالحگ كثروله انياحه

ليش احچي عن ضيم الوطن مامحتاج

جمهور يركض لليهز اصفاحه

صار الوكت للمايقدرون الطيب

او نخل الاماجد ظل يذم لگاحه

ميت صبح احساسه بستان الطيب

او مشلول حاله امن القهر فلاحه

مابيه اسولف خاف اكشف المضموم

راح انسحب مو روحي مامرتاحه

 

مهدي ابوحاجات الهليچي